En esta plataforma de diario digital apostamos por la diversidad cultural, del lenguaje, el arte, la música, el cine.
- Literatura y Misterio en diariodigital.org - 24 de enero de 2026
- La poesía como territorio de la memoria y la intimidad - 24 de enero de 2026
- Del anonimato a la fama mundial - 24 de enero de 2026
MJ Pérez lanza “Perdín a memoria”, unha explosión de liberdade emocional que adianta o seu novo disco
- Unha produción “made in Portugal” da man de Sérgio Miendes, produtor da Garota Não
- O videoclip, rodado no mítico Cine de Osebe, mestura humor, surrealismo e memoria colectiva
- MJ Pérez volve á súa esencia neste tema que recorda a “Ai de Min” ou “O fío do que pendo” e que poderemos escoitar en directo na xira que a artista está a piques de anunciar
Santiago de Compostela, 27 de maio de 2025 – MJ Pérez presenta “Perdín a memoria”, un novo sinxelo que funciona como berro de renacemento, de amor inesperado e de ruptura co pasado. A canción, escrita entre Galicia e Francia, é un tema eufórico que fala de comezos e de deixar atrás a dor desde a alegría, cunha produción coidada feita en Portugal da man do recoñecido músico e productor Sérgio Miendes.
A peza mestura galego e francés nunha letra que se move entre o desexo, a liberación emocional e a vontade de reconectar coa vida. Cun son potente e luminoso, “Perdín a memoria” recupera o espírito de temas icónicos do seu repertorio como “Ai de min!” ou “O fío do que pendo”, nun rexistro co que o seu público máis fiel sentirase identificado.
“É, ao fin e ao cabo, unha canción de amor, de como algo inesperado ou diferente pode chegar a rompernos os esquemas e facernos ver as cousas doutra meneira. Mais non só, tamén é unha canción que fala dun longo camiño interior, de deixar atrás certos momentos difíciles para camiñar cara novos horizontes“
O videoclip rodouse no antigo Cine de Osebe, un local mítico inaugurado nos anos 60 que foi durante décadas punto de encontro e imaxinario compartido para xeracións de veciños e veciñas de Teo. Alí, onde a pantalla proxectaba historias para todos os públicos, a artista decidiu contar a súa propia. “Coa música podo
narrar, pero co audiovisual podo darlle outra dimensión ao que quero dicir”, afirma MJ Pérez, que escolleu este espazo cargado de memoria para transformar o videoclip nunha peza única.
Dirixido por Iago Vilarinho, Gustavo Dieste e MJ Pérez, aposta por unha estética entre o absurdo e o surrealismo, cunha protagonista que se multiplica entre secuencias que mesturan humor, tenrura e forza visual. A posta en escena conta cun vestiario vermello espectacular deseñado por La Mapache, e a corrección de cor é obra do recoñecido Suso Bello.
A produción nace dunha colaboración internacional cociñada a lume lento: Miendes —guitarrista e productor de artistas como A Garota Não ou João Pedro Pais— implicouse desde o primeiro momento, traballando coa artista entre Setúbal e Galicia. O resultado é unha canción que respira frescura, calor e verdade, onde tamén colaboran a percusionista Ailén Kendelman e o produtor Peter Petrowski. A gravación foi rematada en Galicia no inverno de 2024, tras unha actuación conxunta no Auditorio de Galicia en Santiago onde A Garota convidou a MJ a cantar este tema por primeira vez en directo.
Sobre MJ Pérez
MJ Pérez é unha das voces do panorama actual da música galega. Inicia o seu percorrido en 2014 e acumula máis de 200 concertos por toda Galicia e tamén Portugal. Suma xa catro álbums, diversos singles e colaboracións con artistas como CRUA (PT). Estivo presente en festivais e nos principáis circuítos musicais de Galicia.
Cun forte compromiso coa lingua e cultura galegas, combina a súa formación en comunicación audiovisual coa creación musical, producindo os seus propios videoclips, algúns seleccionados en festivais como Cans ou o OUFF. Conta cunha discografía diversa e en constante evolución, con traballos como Guerrilleira, Casandra ou A Luz Prendida.
Foi recoñecida con premios como o Xuventude Crea ou o Martín Códax da Música. Ademais da música, participa activamente en proxectos audiovisuais e iniciativas culturais, destacando pola súa creatividade e compromiso social.
MJ Pérez lanza “Perdín a memoria”
